Tragjedia ne Azi! - Bota Sot

Derguar per "Zeri yt"  Sokol Shameti


Është konstituar sot gjatë një takimi në hotel Tirana, në orën 16.00 një
njësi koordinuese e quajtur "Skuadra Shqipëria" e cila do të marrë
përsipër financimin, organizimin dhe dërgimin në zonën e prekur nga
tërmeti vdekjeprurës i Azisë jugore, një ekip shqiptar mjekësh
epidemiologë dhe higjienistë.

Takimi është zhvilluar me praninë e iniciatorëve: lëvizja Mjaft dhe Parku
Kombëtar i Butrintit, të cilët kishin ftuar të jepnin mbështetjen e tyre
institucione të ndryshme shtetërore dhe private.

Midis të pranishmëve kishte përfaqësues nga presidenca e Shqipërisë,
ministria e financave, ajo e mbrojtjes dhe e shëndetësisë, bashkia e
Tiranës, dhoma e tregtisë, komunitetet fetare, organizata të ndryshme
joqeveritare si dhe biznesmenë, përfaqësues të medias dhe institucioneve
ndërkombëtare.

Përfaqësues të ndryshëm pjesëmarrës në takim shprehën mbështetjen e tyre
për këtë iniciativë humane e cila do ta rendisë Shqipërinë në listën e
vendeve kontribuese për kapërcimin e pasojave të tsunamit që shkaktoi
qindra mijëra të vdekur në një numër shtetesh të Azisë Jugore.

Pas kontakteve me autoritetet e krizës në vendet e goditura, nismëtarët
thanë se më kalimin e ditëve, po shtohet emergjenca dhe nevoja për ndihmë
të specializuar mjekësore pasi rreziku i epidemive dhe sëmundjeve ngjitëse
si pasojë e mosvarrosjes së numrit të madh të viktimave dhe mungesës së
ujit të pijshëm, është në rritje.

Rreziku i kolerës, tifos si dhe epidemive të tjera është shumë i afërt.
Miliona njerëz mes të mbijetuarve të kësaj tragjedie kanë nevojë edhe për
ndihmën më elementare: mjekim për plagët, ujë të pastër për të shuar etjen
dhe veshje të thata. Duke u munduar të kurojnë pasojat e këtij
shkatërrimi, më shumë se 30 vende të botës dhe miliona njerëz janë
solidarizuar nën flamurin e humanizmit në një fushatë globale, kësaj radhe
jo për luftë, por për të ndihmuar vendet e martirizuara nga një fatkeqësi
që mund t'i ndodhte kujtdo.

Për këtë arsye, "Skuadra Shqipëria" ka marrë angazhimin për t'i bërë një
thirrje publike edhe ndjenjës së solidaritetit human të qytetarëve
shqiptarë për të mbështetur me medikamente dhe logjistikë një njësi
vullnetare mjekësh dhe specialistësh të cilët do të ofrojnë asistencën e
tyre në zonat e goditura.

"Shqipëria dëshiron të tregojë në këtë mënyrë, se ndryshe nga mënyra sesi
stigmatizohet në kronikat kriminale si një vend që eksporton shqetësime,
mund të ofrojë shembullin sesi një vend i vogël mund të ofrojë zemrën e
tij të madhe", tha Erion Veliaj, drejtor i MJAFT dhe një nga iniciatorët e
themelimit të Skuadrës Shqipëria.

Nga ana e pjesëmarrësve në takim u shpreh mbështetje dhe midis donatorëve
të parë për "Skuadrën" u renditën menjëherë presidenca e Shqipërisë,
bashkia e Tiranës, Dhoma e Tregtisë, Ministria e Mbrojtjes dhe ajo e
Shëndetësisë, Kryqi i Kuq Shqiptar, etj. Donacionet do të grumbullohen në
një numër llogarie bankare të vënë në dispozicion nga një fondacion që
lëvizja MJAFT ka ngritur për qëllime humanitare dhe brenda pak ditësh
fondet do të jenë vënë në përdorim.

Një sasi medikamentesh do të blihen në varësi të kërkesave që do të bëhen
nga autoritetet e krizës në rajonin Banda Aceh të Indonezisë ku mendohet
se do të ushtrojë veprimtarinë e saj "Skuadra Shqipëria".

Pranë shtabit të "Skuadrës Shqipëria të ngritur në zyrat e MJAFT kanë
nisur ndërkohë aplikimet për të gjithë mjekët vullnetarë që dëshirojnë t'i
bashkohen "Skuadrës", si dhe për të gjithë të rinjtë dhe qytetarët e tjerë
që kërkojnë të ofrojnë asistencë në koordinimin e punëve të skuadrës
brenda vendit.

Organizatorët po kujdesen që "Skuadra Shqipëria" të përfshijë mjekë dhe
specialistë vullnetarë jo vetëm nga brenda kufijve por edhe nga Kosova në
shenjë uniteti dhe mirënjohjeje për atë që komuniteti ndërkombëtar ka bërë
për kombin shqiptar në ditët tona të vështira.

Një numër telefoni AMC do të vihet në dispozicion të të gjithë atyre që
duan të kontribuojnë qoftë edhe me një shumë simbolike prej 100 lekësh me
anë të një mesazhi që do të dërgohet drejt numrit.


Sokol Shameti
Lëvizja Mjaft
Adresa: Rr. Elbasanit, nr 77
Tiranë, Shqipëri
Tel/Fax: +355 4 223 661

Cel: 0692033001
Optional email: sokol@shameti.com
www.mjaft.org

Dëmet e tsunamit, më të mëdha se të një lufte.

Sekretari amerikan i Shtetit Colin Powell sheh nga afër pasojat e tmerrshme të tsunamit në Indonezi

Shekulli

Katastrofa që ka pllakosur në Azinë Jugore, duket se i ka tejkaluar të gjitha imagjinatat njerëzore. Personalitete të huaja që kanë mbërritur dje në Indonezi, dhjetë ditë pas tërmetit vdekjeprurës që shkaktoi përmbytje në gjithë brigjet e Oqeanit Indian, janë shokuar nga pamjet e gjalla të asaj ç'ka mbetur nga qytete e plazhe të tëra. "Unë kam qenë në luftë, kam parë një numër të madh uraganësh, tornadosh dhe operacione masive ndihmash, por kurrë nuk kam parë diçka të tillë". Kështu është shprehur sekretari amerikan i Shtetit Colin Powell pas një vëzhgimi nga ajri të bregdetit verior të ishullit Sumatra, epiqendra e tërmetit 9 -ballësh të 26 dhjetorit. "Nuk mund ta imagjinoj tmerrin që kanë përjetuar familjet dhe gjithë njerëzit që kanë dëgjuar këtë zhurmë që po u vinte, dhe më pas ajo valë e tmerrshme u ka marrë jetët". Powell arriti të shihte gjithë kërdinë që kishte bërë tsunami (vala shkatërruese e shkaktuar nga tërmeti nënujor) në zonën Aceh. Fshatra të tërë ishin marrë me vete nga dallga titanike. Powell gjithashtu mundi të shihte edhe fazën e parë të operacionit masiv të ndihmave për të shpëtuar mijëra jetë të tjera njerëzish. Pasi bëri një udhëtim me helikopter mbi zonat e dëmtuara, Powell zbriti në kryeqytetin e Indonezisë, Xhakarta, ku sekretari i përgjithshëm i OKB-së Kofi Annan dhe liderë të tjerë të botës po mbërrijnë për një samit global mbi tsunamin. Sekretari amerikan i Shtettit edhe pse për pak ditë largohet nga detyra, ka premtuar më shumë ndihma tani që pa nga afër pasojat e tmerrshme. Ai madje shprehu shpresën se ndihma që do t'i jepet Indonezisë, me shumicë myslimane, do t'ia ndryshojë imazhin SHBA-ve në botën arabe (jo pozitiv që pas luftës në Irak). Megjithatë ndihmat për viktimat e tsunamit, po vijnë nga e gjithë bota. Edhe vende të varfra, si Kosova, apo Korea e Veriut kanë ofruar mijëra dollarë në ndihmë të të mbijetuarve. Tsunami goditi 11 shtete rreth Oqeanit Indian, por vendet më të goditura janë Indonezia, India, Sri Lanka dhe Tajlanda. Vetëm në rajonin Aceh të Indonezisë humbën jetën gati 100 000 vetë. Rreth gjysmë milion njerëz janë të pastrehë, ndërkohë që uria, etja dhe plagët e pambyllura kanë bërë që një pjesë e madhe e tyre të mbushin spitalet. Fatkeqësia më e madhe është se shumica e viktimave janë fëmijë. Vala shkatërruese që zgjati vetëm pak sekonda ka rrëmbyer gati gjithë gjeneratën e re të kësaj zone. Ndihmat duket se kanë vërshuar nga anë të ndryshme të botës, por ato kanë mbërritur kryesisht nëpër qytetet kryesore, ku mund të arrihet me mjete. Në zona të thella, larg vëzhgimit të të huajve, duket se gjithë të mbijetuarit do të kthehen në kufoma. OKB ka paralajmëruar se vdekjet do të jenë shumë më të mëdha se 150 000 të konfirmuara deri tani. Me këtë shifër, kjo mund të konsiderohet katastrofa më vdekjeprurëse natyrore e regjistruar ndonjëherë.

Hollywood ndihmon të dëmtuarit në Azi


Shekulli online

Ashtu si miliona persona në të gjithë botën, bota amerikane e spektaklit po mobilizohet për të ndihmuar të dëmtuarit e Azisë së Jugut të prekur nga tsunami gjigand. Aktorja amerikane, Sandra Bullock i dhuroi një milion dollarë Kryqit të Kuq amerikan për të ndihmuar viktimat e tsunamit, ndërsa Leonardo DiCaprio ofroi një shumë të njëjtë për
Fondin e Kombeve të Bashkuara për Fëmijët (UNICEF) për të ndihmuar fëmijët tajlandezë. "Në këtë moment kritik, i shpreh mirënjohjen time Sandra Bullock, e cila edhe një herë tregoi dhembshuri dhe besim më misionin tonë humanitar", deklaroi Marsha Evans, kryetare e Kryqit të Kuq amerikan në një komunikatë. Leonardo DiCaprio, protagonist së bashku me aktoren franceze Virginie Ledoyen në filmin "Plazhi" i xhiruar në 2000 në ishullin e Koh Phi Phi, sot i shkatërruar, u tregua veçanërisht bujar. Sipas shoqërisë së specializuar "Access Hollywood", Leonardo DiCaprio i ofroi UNICEF-it një milion dollarë për të ndihmuar fëmijët e mbijetuar në këtë ishull, që ndodhet në juglindje të Phuket. "Leonardo u tregua veçanërisht bujar", tha për AFP-në Lisa Szarkowski, një zyrtare e UNICEF-it, pa konfirmuar shumën e derdhur nga aktori. Regjisori Steven Spilberg dhuroi 1,5 milionë dollarë për tre organizata bamirëse (Save the Children, Care dhe Oxfam), bëri të ditur agjenti i tij Marvin Levy. Levy saktësoi se regjisori i "Jurassic Park" dhe "E.T." vendosi ta bëjë publik dhurimin e tij për të nxitur persona të tjerë të angazhohen. Heroina e serialit televiziv amerikan "Sex and the City", Sarah Jessica Parker, u angazhua në mbledhjen e fondeve për UNICEF-in, ashtu si edhe komikja Mia Farrow apo aktori britanik Roger Moore. "çdo ditë, ne kemi mbështetjen e shumë yjeve që përfitojnë nga imazhi i tyre për të mbledhur fonde dhe për të zgjuar ndërgjegjen e publikut", tha Simon Ingman, zëdhënës i UNICEF-it. Nga ana e këngëtarëve të rrokut, grupi i rrymës "heavy metal", "Linkin Park" ofroi 100 000 dollarë për Kryqin e Kuq dhe ftoi fansat e tij të tregoheshin gjithashtu bujarë. "Nëse secili nga fansat tanë do të japë dhjetë dollarë, kjo mund të ndihmojë dhe sa më shpejt aq më mirë", tha Brad Delson, kitarist i grupit rrok, që ka dhënë një koncert në Tajlandë në qershor. Prezantuesi i famshëm i NBC, Jay Leno, vendosi të nxjerrë në ankand motorrin e tij "Harley-Davidson" të zbukuruar me autografet e të ftuarve të famshëm të "Tonight Show". Të ardhurat nga ankandi do të shkojnë për shoqata bamirëse. Shoqata e Shtypit të Huaj në Hollivud (HFPA), që jep çdo
vit çmimet "Golden Globe" të kinematografisë, mblodhi 250 000 dollarë që do të derdhen në llogaritë e katër organizatave bamirëse (Aksion kundër Urisë, Save the Children, Fondacioni tërmet në Azi dhe Mjekët pa Kufi). "Edhe pse të ardhurat tona përdoren zakonisht për të ndihmuar në restaurimin e filmave apo për vepra në favor të kinematografisë, menduam se një organizatë ndërkombëtare si kjo jona duhet të kontribuonte gjithshtu për të ndihmuar miliona viktima të kësaj katastrofe", tha Lorenzo Soria, kryetar i HFPA.