Moska, Kryeqyteti i Rusise - Gjeografia e Shteteve

×
Albanian Forums, Zerion Zeri yt Zeri Info, Forumi Shqiptar Al Virtual, Diskutime, Biseda, Chat Njofje, Informatika, Teknologjia, Gazeta Tema, Gazetat Shqiptare, Bota Sot, www Channel Albania, Telegrafi Kosovo, Ballkani Web, Gazeta Lajme shqip, Lajmet e Fundit Shqiperia Kosova, Dita, Panorama, Kryeartikull, Faqja Kryesore, Video Shqip, Muzike Shqipe, Njoftime, Lajmerime, Temat Online, Gazetat, Kosovare, Shtypi Ditor, Sporti Shqiptar, Dashuria, Pyetje Pergjigje, Keshilla, Ndihme, Webmaster Shqiptar, Familja, Shqiptaria, Muzika, Receta Gatimi, Imazhe, Vipat-shqiptar, Aktualiteti
Media Sociale
Mesazhe Private
Shqiptaret duke lexuar tema interesante dhe te ndryshme
Tema re

Moska, Kryeqyteti i Rusise

Moska, Kryeqyteti i Rusise

· 2 · 2707

  • Postime: 27109
  • Karma: +11/-5
  • Gjinia: Mashkull

ne: 08-02-2008, 10:37:55
Moska është një ndër qytetet më të vjetra dhe më të bukura të Rusisë. Perandorët ose carët e kthyen qytetin në bazën e tyre të urdhrave deri në vitin 1712, kur kryeqytet i Rusisë u bë San Petërburgu. Moska u rikthye në kryeqytet të Rusisë në vitin 1918 dhe shërbente si kryeqyteti i ish-Bashkimit Sovjetik nga viti 1922 deri në vitin 1991.



Moska ka një histori të gjatë dhe dramatike. Qyteti është shkatërruar dhe rindërtuar disa herë përgjatë viteve. Ndërtesat e saj më të vjetra prej druri janë zhdukur në zjarre. Sa herë që qyteti e merrte veten pas hirit të flakëve, bëhej gjithmonë e më i bukur. Për çdo ndërtesë të Moskës thirreshin arkitektët më të mirë nga e gjithë bota për ta restauruar. Historia e rikonstruksionit të Moskës është një ndër arsyet që ajo ka absorbuar stile të ndryshme e të veçanta.

Moska përshkohet nga lumi i Moskës, i cili përbëhet nga shumë degë, midis tyre Oka dhe Vollga. Degët më të mëdha të këtij lumi janë Yausa dhe Setun.
Ekziston një legjendë që thotë se Moska mbështetet në shtatë kodra. Në të vërtetë, kodrat janë vetëm një pjesë e territorit të Moskës, por pjesa më e lartë është ajo jugperëndimore e qytetit. Gjeografikisht, përkufizohet si “Teplostanskaya mbikodrinore”.

Pjesa qendrore e zonës së qytetit dhe ajo lindore janë më tepër të rrafshëta dhe të ulëta. Klima e Moskës është kontinentale, më tepër se në çdo qytet tjetër evropian. Temperaturat janë tepër të ulëta. Periudha e shirave zgjat nga prilli në nëntor, ndërsa periudha e borës nga nëntori në prill.   
Një vështrim mbi eventet e Moskës

Një numër i madh festivalesh zhvillohen në Moskë, sipas traditës së kishës ortodokse. Krishtlindjet ortodokse fillojnë me meshën në mesnatën e 7 janarit. Pashkët ortodokse, të njohura si “Paskha”, festohen në mars ose në prill dhe fillojnë në mesnatë me një ceremoni në kishë, pas së cilës njerëzit hanë kekun e veçantë të kishës, si dhe vezë me ngjyrë.

Si një traditë shumëvjeçare, festivali i filmit i Moskës e ndryshon atmosferën e qytetit gjatë vjeshtës. Ndërsa “Festivali rus i dimrit” është më tepër një panair turistësh, në të cilin zhvillohen shfaqje të ndryshme folklori, lojëra dhe ku vodka konsumohet me shumicë. Ky festival festohet gjatë periudhës së 25 dhjetorit deri më 5 janar.

“Novy God” është “viti i ri rus” dhe është festivali më i rëndësishëm i vitit, në të cilin bëhen dhurata pa fund, shpesh të vendosura poshtëë bredhit të Vitit të Ri. Moskovitët e lënë pas vitin e vjetër me vodka dhe e mirëpresin vitin e ri me shampanjë.
 
Çfarë mund të bëni tjetër në Moskë?

Noti


Pishinat publike janë disi dredharake, pasi të duhet një vërtetim mjeku, i cili të pohojë se jeni aq të shëndetshëm sa të mundeni të zhyteni. “Pishina Chaika” ofron vetë një kontroll të tillë. Në ditët me diell të verës mund të shkoni në Serebryaniy, në pjesën veriore të qytetit, për të ndjerë pak nga ngrohtësia e rërës. 
Qetësim

“Banya” është një traditë e vjetër ruse dhe shumë moskovitë e kanë atë pjesë të rëndësishme të javës së tyre. Elementët kryesorë të saj janë një dhomë me avuj të nxehtë (e cila, siç thuhet me shaka, i bën finlandezët të duken të butë) dhe një kamxhik i mirë prej mështekne (sigurisht për vetitë e tij detoksifikuese). Banjat Sandunovskiye, me dhomat gotike dhe me atmosferën e përgjithshme aristokratike dekadente, janë vendi më i përshtatshëm “për të thekur” veten. 
Ski në borë

Rusia nuk mund të konceptohet pa ski në borë. Është aktivitet klasik, i cili do t’ju sjellë në kontakt me banorët vendës. Vendet më popullore dhe më tradicionale janë “Gorky Park” dhe “Izmaylovsky Park”. 

Çfarë mund të vizitoni në Moskë?

Muzetë e Kremlinit të Moskës



Kremlini i Moskës është zemra e kryeqytetit rus. Rrugë kryesore të qytetit takohen në një pikë në Kremlin ose formojnë seri rrathësh koncentrike rreth tij. Pallati i madh i Kremlinit dhe Pallati i Kongreseve janë vendet e zhvillimit të kongreseve të deputetëve të Rusisë.

Koleksionet e muzeve të Kremlinit janë të veçanta në llojin e tyre. Ato përmbajnë piktura të hershme ruse, ikona, fresko të shekujve të 12–17-të, karroca, slita dhe rroba ceremoniale kuajsh të shekujve të 16–19-të, tapete orientale dhe tapiceri europiane përëndimore, artikuj nga argjendari ruse dhe europiane, artikuj shtëpiakë, libra, porcelane, gurë të gdhendur dhe gjetje arkeologjike. 
Muzetë me famë botërore të Moskës dhe galeritë me koleksionet e tyre janë disa nga më të mëdhenjtë e më të rëndësishmit në mbarë botën. Ekzibicione të ndryshme arti shpalosin bashkë të renë me klasiken, ashtu siç bënin dikur në kohërat pararevolucionare dhe derivohen nga degë të ndryshme të artit, si piktura, fotografia dhe skulptura.

Një nga muzetë e artit më të vizituar në Moskë është Galeria Tretyakov, e cila u hap nga Pavel Tretyakov, njeri shumë i pasur i artit, i cili dhuroi një koleksion privat shumë të madh. Kjo galeri është e ndarë në dy ndërtesa.

Tretyakovi i Vjetër, galeria e vërtetë në zonën Tretyakovskaya, në pjesën jugore të lumit të Moskës, përmban punimet tradicionale klasike ruse. Punimet e piktorëve pararevolucionarë të famshëm, si Ilya Repin, ashtu si edhe punimet e piktorëve rusë të ikonave, mund të gjenden në këtë galeri. Vizitorët mund të shikojnë edhe piktura të rralla origjinale të përpara shekullit të 15-të, të punuara nga ikonografi Andrei Rublev.

Tretiakovi i Ri, i krijuar gjatë epokës sovjetike, kryesisht përmban punimet e artistëve sovjetikë, si edhe koleksione kontemporane.
 
Një tjetër muze në qytetin e Moskës është edhe Muzeu Pushkin i Arteve Të bukura, i cili është hapur nga i ati i Maria Tsvetaevas. Muzeu Pushkin është i afërt me Muzeun Britanik të Londrës, në hollet e të cilëve kryqëzohen punime të civilizimit modern me skulptura antike. Ky muze përmban piktura të famshme nga çdo epokë e rëndësishme e artit përëndimor, punime nga Klaude Monet, Paul Cezanne dhe Pablo Picasso.

Muzeu Historik Shtetëror i Rusisë është muze i historisë ruse, në të cilin përfshihen që nga reliket prehistorike e deri punimet e artit të dinastisë Romanov.Totali i objekteve në muze numëron miliona.Muzeu Politeknik u formua në vitin 1872 dhe është muzeu më i madh teknik në Rusi, i cili ofron një sërë shpikjesh historike dhe zhvillimesh teknologjike.   
Moska është gjithashtu zemra e arteve ruse të performuara, përfshi këtu baletin dhe filmin. Në Moskë ekzistojnë 93 teatro, 132 kinema dhe 24 salla koncertesh. Midis shumë teatrove të Moskës dhe studiove të baletit, është edhe Teatri Bolshoi dhe Teatri Malyi, por edhe Moscow Art Theatre.

Salla Qendrore Shtetërore e Koncerteve është e famshme për performancat e baletit dhe estradës, si dhe është vendi i koncerteve të artistëve të mëdhenj. Është e pozicionuar pranë ndërtesës së Hotel Rossiya, më i madhi në Europë.

Qendra Ndërkombëtare e Arteve të Performuara të Moskës u hap në vitin 2003 dhe njihet për performancat e muzikës klasike. Gjithashtu, ka organon më të madhe në Rusi.Në Moskë ka edhe dy cirqe të mëdha, Cirku Shtetëror i Moskës dhe Cirku i Moskës në bulevardin “Tsvetnoy”.   

Revista Spekter

  • Postime: 27109
  • Karma: +11/-5
  • Gjinia: Mashkull

#1 ne: 18-07-2008, 15:47:19
Moda e re në Moskë

Trotuaret zihen nga lokalet e panumërta


Shiu i rrëmbyer, që vazhdoi për orë të tëra, lagu gjithçka, tavolinat dhe karriget e barit, por gruaja që po kërkon ku të ulet nuk e sheh si ndonjë problem të madh. "Vera në Moskë zgjat vetëm 2 muaj", thotë 40-vjeçarja Nargis Gujamova. "Nuk kemi shumë shans për të ndenjur jashtë".

Të gjesh një kopsht, apo bahçe me pak gjelbërim në këtë qytet me arkitekturë monumentale dhe ku ndërtohet në çdo qosh thuajse me padurim është një sfidë e mirëfilltë. Kështu që, sipas asaj që shpjegon gruaja, moskovitët nuk lënë t‘u shpëtojë asnjë shans për të ndenjur jashtë e për të kundruar ndonjë copëz natyrë. Dhe duhet më shumë se shi për t‘i bërë të heqin dorë nga kjo kënaqësi. "Të gjesh mundësinë të ulesh 15-20 minuta jashtë, është goxha dhuratë", thotë. "Sot pashë që binte shumë shi dhe mendova të mos vija. Por më pas mendova se nuk duhej ta humbisja shansin".

Me temperaturat që luhaten mes 15-18 gradëve Celsius, me gjithë reshjet e rënda, lokalet verore që hapen e mbyllen vetëm gjatë këtij harku kohor janë kthyer në një traditë për Moskën. Rrugët e trotuaret janë kolonizuar pak e nga pak nga lokale që gjenden kudo, anës bulevardeve, rrugicave, nëpër bahçe shtëpish, me pak fjalë, kudo ku ka hapësirë. Çmimet janë të kripura: një kapuçino kushton nga 4 deri në 8 dollarë.

Ndërkaq, edhe rrjetet popullore të lokaleve, si "Shokoladnica" (Vajza prej çokollate) apo "Kofe House" janë përpjekur t‘i përshtaten kësaj nevoje të shtresës në rritje të profesionistëve moskovitë, të cilët nuk mund t‘i lejojnë vetes lokalet luksoze, por që, gjithsesi, kanë arritur të vënë mënjanë ndopak të ardhura.

Përhapja e lokaleve moskovite nëpër rrugë, trotuare, parqe e bahçe - e shtyrë edhe nga kryetari i Bashkisë së Moskës, Juri Luzhkov, janë pjesë e atij fenomeni që Guliamova, duke pirë kafenë ekspres në sheshin "Pushkin", e quan problem të shkaktuar nga qeveria, siç është ai i kufizimeve të mëtejshme që u janë vendosur kolegëve të saj gazetarë.

"Nëse, me gjithë këto probleme që kemi, nuk do të kemi shans as të pimë një kapuçino, gjërat do të ishin me të vërtetë shumë keq".

Çdo pranverë restorantet dhe baret nisin njëherësh ndërtimin e tarracave të drunjta, të cilat mbulojnë ato që për nder të pak muajve gjallëri quhen kafetë verore. Netët verore janë të gjata dhe ditët shpesh me diell, por jo të nxehta.

"Po të mos kesh në dispozicion ambient të jashtëm, gjatë verës do të bëje mirë as të mos e hapje fare", thotë australiani Natan Delimor, një prej kuzhinierëve kryesorë të barit të Denis Simaçjov, lokal i vendosur ngjitur me butikun e këtij stilisti të njohur rus.

Ky lokal veror që gëlon nga klientët gjendet në Stoleshnikov Pereulok, një rrugë këmbësorësh shumë pranë Kremlinit. Arkitekti 32-vjeçar, Vitali Karpov, dhe bashkëshortja e tij 29-vjeçare Olga Neronskaja, që janë nga Siberia, në Moskë kanë ardhur vetëm për vizitë, qëndrojnë prej një copë here në lokal duke pirë kafetë ekspres e duke tymosur cigaret. Ciklat e shiut të rrëmbyer kanë mbërritur deri te këmbët e tyre. Janë që të dy të zhgënjyer që gjatë kësaj vizite në Moskë bënte më ftohtë se në qytetin e tyre, por Karpovi thotë: "Duhet ta shijojmë Moskën sa të mundemi".

Në "Venezia Trattoria", restorant i vendosur brenda një pallati, tavolinat e të cilit janë nxjerrë në bahçen përpara tij, historianët e artit, Aleksei Bartomeviç dhe Lena Kaiçenko, sapo kishin ngrënë supën me kërpudha dhe po prisnin mbërritjen e pjatës së dytë me tortelini, në çastin kur shiu u prishi çadrën që u mbulonte tavolinën.

Të dy kolegët, që punojnë në Institutin e Studimit të Arteve, hanë thuajse çdo ditë në këtë restorant, shi apo diell qoftë. Asaj i duhet të bëjë tre punë akademike njëherësh, ndërsa atij dy, për t‘i lejuar vetes një luks të tillë. Në këtë restorant pjata kryesore kushton më shumë se 400 rubla, ose rreth 17 dollarë.

Karpovi kujton ditët e epokës sovjetike, kur kafenetë qenë aq të rralla sa kishte njerëz që nuk i frekuentonin fare. "Po të më thoshe se do vinte një ditë kur do uleshim çdo ditë nëpër lokale, nuk kisha për ta besuar", thotë.

Por, nga ana tjetër, këto lloj lokalesh të përkohshme nënvizojnë edhe më tej pabarazinë në rritje mes të pasurve e të varfërve. 18-vjeçarja Nastja Fomina, teksa tymos bashkë me katër shoqe të tjera në "Prime Star", në rrugën "Kamergerski Pereulok", një tjetër e rezervuar vetëm për këmbësorë, thotë se bezdiset së tepërmi kur njerëz që kalojnë aty i afrohen në tavolinë e i kërkojnë para.

Megjithëse ofron një meny shumë të thjeshtë, të përbërë nga gatime tradicionale, të përzier tek-tuk me ndonjë recetë të huaj, një drekë e lehtë mund t‘i kalojë 20 dollarët. Fomina thotë se prindërit e saj janë aq të pasur, sa t‘i krijojnë mundësinë të shkojë thuajse përditë aty bashkë me shoqet e shokët. "Na është kthyer në ritual", thotë.

Njerëzit që nuk mund t‘i lejojnë vetes luksin për t‘u ulur kafeneve kanë gjetur mënyrat e veta për të shijuar ditët e bukura të verës. Një prej këtyre netëve, në orën dhjetë të mbrëmjes, thuajse të gjithë stolat e bulevardit "Tverskaja" qenë të zëna nga njerëz që pinin birra, përfshi edhe Aleksandr Mikhailoviçin bashkë me tre shokë të tij.

31-vjeçari fiton 19 mijë rubla në muaj (rreth 816 dollarë), duke punuar 11 orë në ditë si rojtar. Ai shpjegon se nuk ia mban xhepi të pijë birra apo kafe nëpër këto lokale të shtrenjta. Ndërkohë që e ka zgjidhur problemin, duke blerë birra që kushtojnë 30 rubla shishja (1.28 dollarë), të cilat i konsumojnë ku të munden.

"Pas një pune me orar kaq të zgjatur sa e imja, njeriu ka nevojë të qetësohet pak e të takohet me miqtë", thotë. Dielli në ngjyrë të kuqërremtë u ka dhënë një dritë thuajse magjike reve në qiell dhe ka veshur me këtë tis edhe kishën e bukur që ndodhet në fund të parkut. Të paktën kjo është pa pagesë.

Gazeta Shqip

Temat e fundit