Post reply

×

Post reply

Emri:
Email:

Verifikimi:
Flamuri yne ka ngjyre?:

Permbledhje

Postuar nga: InfoZ
« ne: 24-11-2020, 18:17:56 »

 

Një vaksinë për Covid-19 e prodhuar nga Universiteti britanik i Oksfordit dhe firma farmaceutike AstraZeneca ka treguar rezultate të mira në provat e hershme klinike. Siç e shpjegon korrespondenti i Zërit të Amerikës, Henry Ridgwell, vaksina është e përshtatshme për shpërndarje të shpejtë në të gjithë globin.


Analizat paraprake të provave me 20 mijë vullnetarë në Britani dhe Brazil tregojnë se vaksina e koronavirusit e Universitetit të Oksfordit dhe kompanisë AstraZeneca është të paktën 70 për qind efektive pas marrjes së dy dozave. Vullnetarët u injektuan me doza të ndryshme, dhe tek ata që morën gjysmë dozë fillimisht, të pasuar nga një dozë e plotë,efektshmëria e vaksinës u rrit në 90 për qind. Asnjëri prej atyre që morën vaksinën nuk u sëmur rëndë nga Covid-19.


“Me të vërtetë është një moment i shkëlqyeshëm që tani kemi shumë vaksina. Nëse mund t’i shpërndajmë ato sa më shpejt që të jetë e mundur, ne do të kemi një ndikim të madh”, tha Andrew Pollard, drejtor i Grupit të Oksfordit për Vaksinat.

AstraZeneca planifikon të fillojë shpërndarjen e qindra miliona dozave deri në fund të vitit, në varësi të autorizimit të rregullatorëve. Mjekët thonë se disa veti të vaksinës e bëjnë atë të përshtatshme për shpërndarje globale.

 

 

“E para është kostoja. Pra, çmimi i kësaj vaksine do të jetë sa rreth një e pesta deri një e dhjeta e kostos që është raportuar se kërkohet nga Pfizer dhe Moderna, dy kandidatët e tjerë kryesorë të vaksinave”, tha Dr. Peter Drobac, ekspert i shëndetit global në Universitetin e Oksfordit.

AstraZeneca është zotuar se nuk do të përpiqet të nxjerrë fitime nga vaksina gjatë pandemisë.

“Në dhjetë vende tashmë vaksina është duke u prodhuar, përfshirë Indinë. Pra, ne shpresojmë që së shpejti të kemi në dispozicion një numër shumë të madh dozash. Dhe së treti, kjo vaksinë mund të ruhet në temperaturën normale të frigoriferit”, tha Dr. Peter Drobc.

Ndërsa vaksina kompanisë Pfizer duhet të ruhet në një temperaturë minus 70 gradë celsius.

Shumë sisteme shëndetësore në vendet në zhvillim kanë mungesa të pajisjeve ftohëse për të ruajtur ilaçet në temperatura shumë të ulta.

Deri më tani 188 vende kanë nënshkruar iniciativën COVAX, e cila bënë thirrje që vendet më të pasura të investojnë në zhvillimin e disa vaksinave dhe infrastrukturës së nevojshme për shpërndarjen e tyre në të gjithë globin.

“Qëllimi ideal do të ishte që secili prej vendeve që regjistrohen në iniciativën COVAX të marrë doza të mjaftueshme të vaksinës për 20 për qind të popullsisë së tyre deri në fund të vitit 2021. Tani kjo është një aspiratë, jo një garanci. Por kjo do të krijonte mundësinë që çdo vend të paktën të vaksinonte punonjësit më të rrezikuar”, tha Dr. Drobac.

Kandidatët kryesorë të vaksinave mund të marrin një autorizim emergjent nga rregullatorët në javët e ardhshme, duke rritur shpresat se bota është në prag të një arritje të madhe në luftën kundër pandemisë.

Ndërkohë, mjekët thonë se është jetike që njerëzit të respektojnë masat për frenimin e përhapjes së koronavirusit./VOA
Postuar nga: InfoZ
« ne: 12-11-2020, 14:15:49 »

Ditën e hënë, dy korporata farmaceutike Pfizer dhe BioNTech dhanë lajmin e mirë se vaksina e tyre ka rezultuar 90% e suksesshme kundër Covid-19. Testimet e kryera në mbi 43,000 njerëz ndezën shpresat për një dritë në fund të tunelit të gjatë e të mundimshëm të pandemisë. Megjithatë lajmi se një vaksinë që arrin të mposhtë virusin SarsCov2 ka dalë në qarkullim nuk do të thotë se i gjithë globi do ta marrë atë si dhuratë për Krishtlindje. Garantimi i efektshmërisë ishte prova e parë e zjarrit, shpërndarja te çdokush që ka nevojë për të në të gjithë botën është ajo që do rezultojë edhe më e vështirë. Dhe është pikërisht kjo pyetja që shumë qytetarë të botës dhe Shqipërisë kanë ngritur: Kur do të bien në kontakt me vaksinën?



Ditën e djeshme Ministrja e Shëndetësisë, Ogerta Manastirliu lajmëroi se Shqipëria është pjesë e një aleance prej më shumë se 180 shtetesh që kanë financuar të kenë akes te vaksina sapo ajo të jetë e disponueshme në treg. Por a është vërtetë kaq e thjeshtë që vaksina të mbërrijë në Shqipëri deri në fund të 2021?


Përgjigja e thjeshtë është varet. Janë një sërë faktorësh që do të përcaktojnë momentin kur vendi ynë do të marrë dozat e para të vaksinës së emëruar BNT162b2.

Së pari, Shqipëria është pjesë e një mekanizmit global të quajtur Covax, i cili është krijuar për të nxitur zhvillimin e shpejtë të vaksinave kandidate ndaj COVID-it, prodhimin në masë të gjerë të vaksinave të certifikuara dhe shpërndarjen e shpejtë e të barabartë për të gjitha vendet. Qëllimi i COVAX-it është që të sigurojë 2 miliardë doza për t’i shpërndarë deri në fund të vitit 2021, një sasi mëse e mjaftueshme për të ndihmuar të gjithë vendet anëtare që të vaksinojnë 20% të popullsisë së tyre dhe t’i japin fund fazës akute të pandemisë. Nëse të gjithë shtetet e globit do të ishin të anëtarësuara në këtë mekanizëm, kjo do të shuante çdo dyshim se Shqipëria do ta merrte vaksinën deri në mbyllje të vitit tjetër.

Janë të shumtë shtetet që nuk kanë pranuar të jenë pjesë e këtij organizmi dhe kanë bërë porositë paraprake individuale. Këtë të mërkurë Komisioni Europian ka porositur 300 milionë doza për 27 vendet e bllokut, ndërsa SHBA pritet të marrë 100 milionë dhe Mbretëria e Bashkuar pritet të porosisë 40 milionë. Nëse aprovohet kërkesa e tyre atëherë sasia që do të mbetet për vendet e tjera do të jetë tepër e vogël. Duke marrë parasysh që Pfizer dhe BioNTech kanë deklaruar që do të prodhojnë 50 milionë doza deri në fund të 2020-tës dhe 1.3 miliardë deri në mbyllje të 2021-shit, nëse shtetet që do të ofrojnë më tepër para do të marrin vaksinën të parët, sasia e mbetur për 184 vendet e COVAX-it por edhe për shtete të tjera joanëtare por që duan ta përfitojnë atë, është shumë e vogël.
Sa shpejt mund të presim një vaksinë kundër koronavirusit?

Pfizer dhe BioNTech kanë premtuar afro 1.3 miliarë doza por fatkeqësisht kjo nuk është mjaftueshëm. Për këtë arsye sytë janë kthyer sërish të shkencëtarët për të zhvilluar alternativa të tjera përveç vaksinës që arriti të sigurojë 90% efektivitet në mposhtjen e virusit. Kështu, Rusia thotë se provat e vaksinës së saj Sputnik-V kanë treguar shenja pozitive tek pacientët dhe e ka hedhur vaksinën për përdorim publik vijon me tesimet. Kina thotë se ka zhvilluar një vaksinë të suksesshme që po vihet në dispozicion të personelit të saj ushtarak. Prodhuesi britanik i ilaçeve AstraZeneca, i cili ka licencën për vaksinën e Universitetit të Oksfordit, po rrit kapacitetin e saj global të prodhimit dhe ka rënë dakord të furnizojë 100 milion doza vetëm në MB dhe ndoshta dy miliardë për mbarë botën – nëse do të jetë e sigurt. Por ndërkohë ka me dhjetëra kompani të tjera farmaceutike me prova klinike në proces.

Kush do të vaksinohet i pari?

Megjithëse kompanitë farmaceutike e krijojnë vaksinën, ata nuk mund të vendosin se kush vaksinohet i pari. Meqenëse furnizimi fillestar do të jetë i kufizuar, zvogëlimi i rasteve më imediate dhe mbrojtja e personelit shëndetësor ka të ngjarë të ketë përparësi. Duke ndjekur planin e mekanizmit global COVAX, pjesë e të cilit është dhe Shqipëria, mendohet se nëse sigurohen aq shumë vaksina sa për të mbuluar 20% të popullsisë, përparësi do tu jepet personave mbi 65 vjeç dhe grupeve të tjera të prekura.  Pasi të gjithë të kenë marrë 20%, vaksina do të shpërndahet sipas kritereve të tjera, siç janë cenueshmëria e vendit dhe kërcënimi i menjëhershëm i Covid-19.

Si do të ruhet dhe shpërndahet vaksina?

Vaksina që mban emrin BNT162b2, që ka rezultuar 90% efektive në luftën kundër koronavirusit duhet të ruhet në një temperaturë konstante prej të paktën -80oC. Ministrja e Shëndetësisë ka thënë se Shqipëria i ka siguruar kapacitetet frigoriferike për të mbajtur rezervat e para të vaksinës, pas specifikuar se sa mund të përballojnë këto frigoriferë.

Teksa qeveritë e vendeve të mëdha kanë vënë bastet e tyre për disa vaksina të mundshme duke bërë marrëveshje për miliona doza me një sërë kandidatësh përpara se ndonjë gjë të jetë certifikuar zyrtarisht, dozat në qarkullim për shtetet më pak “të favorizuara” sa vijnë e pakësohen.  Ndonëse rrjete si Covax janë zotuar për një shpërndarje të barabartë të vaksinave, vende si Shqipëria mund t’ju duhet të presin përtej 2021-shit.

Paola Serjanaj

©Lapsi.al
Postuar nga: InfoZ
« ne: 09-09-2020, 23:31:40 »

 

Më shumë se 170 vaksina kandidate kundër SARS-CoV-2 janë në garë. Shtatë prej tyre janë në fazën e tretë dhe të fundit të provave klinike. Proceset që normalisht zgjasin me vite po zhvillohen me shpejtësi rekord. Bëhet fjalë për jetën (dhe vdekjen), për para dhe pushtet.

Kjo është arsyeja pse zhvillimi i vaksinave është edhe një çështje politike. Donald Trumpi dyshon se Administrata Amerikane e Ushqimit dhe Medikamenteve (FDA) po e ngadalëson qëllimisht punën për një vaksinë efektive, sepse dëshiron të parandalojë që Presidenti të zbukurohet me dafinat e pretenduara të luftëtarit të pandemisë, para përfundimit të mandatit të tij në detyrë.

Kjo na kthen në shkencë: Për cilat dafina mund të flasim? A është me të vërtetë një vaksinë medikamenti gjithëshërues? Pyetje për imunologun Thomas Kamradt.

DW: Sapo të gjendet vaksina, gjithçka do të jetë në rregull – shumë duket se e presin këtë. A është e justifikuar kjo pritje?

Thomas Kamradt: Personalisht, unë do të isha i kënaqur nëse do të kishte një vaksinë të sigurt që do të rifreskohej çdo dy vjet, për mendimin tim, por që të ketë një efekt masiv në rrjedhën e sëmundjes. Vaksinimi mund të mos pengojë ndoshta që të keni rrufë ose simptoma të tjera të lehta.

Por kërkesat minimale do të ishin që vaksina të parandalojë insuficiencën e frymëmarrjes dhe dëmtimin e rëndë të organeve. Kështu që nëse më pyet se çfarë po presim, kjo është ajo që presim. Nëse një vaksinë e tillë nuk do të bënte asgjë tjetër veç se do ta kthente një kurs të rrezikshëm për jetën në një kurs të lehtë, unë do ta konsideroja atë sukses. Çdo gjë përtej kësaj do të ishte një sukses i madh.

“Imuniteti i tufës është epoka e gurit”

Vetëm kohët e fundit u raportua për një infeksion të ri. Një i ri nga Hong Kong-u ka dalë pozitiv me virusin për herë të dytë. Deri atëherë, kishte shpresë se kushdo që kishte kaluar infeksionin do të ishte imun. A vdiq me këtë edhe ideja e “imunitetit të natyrshëm të tufës”?

Pavarësisht nga ky lajm: Imuniteti i tufës është Epoka e Gurit! Po të shohësh se cilat nivele të infektimit do t’ju duheshin dhe sa e lartë do të ishte vdekshmëria, atëherë kjo është një metodë e Epokës së Gurit. Gjë që gjithashtu do të zgjaste pafundësisht. Tani ne duhet të nisemi nga fakti se imuniteti nuk do të zgjasë për gjithë jetën. Prandaj shpresoj që askush të mos mbështetet më në imunitetin natyror të tufës. Imuniteti i tufës arrihet me vaksinat.

Pavarësisht nga rastet individuale dhe thjesht hipotetike: Ekzistojnë disa lloje të koronavirusit të ri me të cilin dikush mund të infektohet përsëri. Çfarë do të thotë kjo për zhvillimin e një vaksine efektive?

Ndryshimet e viruseve janë kryesisht të interesit epidemiologjik, sepse ato lejojnë gjurmimin e vatrave të infeksioneve. Deri tani, nuk ka asnjë provë se ndryshimet midis llojeve të ndryshme SARS-CoV-2 janë me rëndësi të madhe për efektivitetin e një vaksine. Ndryshe nga gripi.

“Testet e sigurisë nuk duhet të bëhen kalimthi”

Le të flasim për zhvillimin e vaksinave, i cili po ndodh me një ritëm të pabesueshëm. Disa shkencëtarë paralajmërojnë kundër hedhjes në treg të një vaksine potencialisht joefektive dhe të pasigurt vetëm për të qenë të shpejtë. Si shkencëtar, a shqetësoheni për ritmin e zhvillimit të vaksinave?

Deri tani jo, deri tani jam vërtet i ngazëllyer! Zakonisht duhen mbi dhjetë vjet që një vaksinë të ofrohet në sasi të mëdha në mënyrë që të vaksinohen të gjithë. Rekordin e deritashëm e mban vaksina për Ebolën, u deshën rreth pesë vjet deri në miratim. Kursu tani gjithçka ecën shumë më shpejt.

Ka disa arsye për këtë: Së pari, nga SARS dhe MERS e dinim se proteina spike ka të ngjarë të jetë një shënjestër e mirë për të aktivizuar imunitetin. Kjo do të thotë që nuk kemi pasur nevojë të fillojmë nga e para te një virus krejt i ri.

Veç kësaj, ekzistojnë edhe teknika krejtësisht të reja. Deri jo shumë kohë më parë, zhvillimi i vaksinave kërkonte që viruset të dërgoheshin në të gjithë botën, të rriteshin më pas në kulturat qelizore etj.

Këtu, studiuesit kinezë e vendosën sekuencën e virusit në internet në janar. Ti mund t’i krahasoje atë me SARS dhe MERS, kjo ndodhi tepër shpejt. Si rezultat, studimi i parë klinik i fazës 1, i cili ishte vaksina mRNA e Moderna, filloi që në mars.

Ajo që rrit gjithashtu shpejtësinë e të gjithë procesit është që hapat që normalisht zhvillohen njëri pas tjetrit janë paralelizuar. Për shembull, që tani janë krijuar qendra prodhimi për vaksina, që mund të mos ekzistojnë kurrë.

Ajo që nuk duhet të ndodhë kurrë është që testet e sigurisë të bëhen më me cektësi se zakonisht! Sado e keqe është e gjitha, 80 për qind e atyre që shfaqin simptoma përfundojnë vetëm me simptoma të lehta. Kjo do të thotë, që po të vaksinoj kundër diçkaje të tillë, duhet të jem shumë i sigurt se nuk po shkaktoj ndonjë dëm! Më në fund, ua bëj vaksinën njerëzve të shëndetshëm.

Kur e ke në dispozicion një vaksinë, lind pyetja se kush do të vaksinohet. Sidomos kush dëshiron të vaksinohet fare. Sipas një analize nga Qendra e Hamburgut për Ekonomi Shëndetësore, gatishmëria e popullatës së BE për t’u vaksinuar kundër koronavirusit të ri është në rënie. Një nga shqetësimet më të mëdha që kanë njerëzit janë efektet anësore të mundshme. A e kuptoni këtë shqetësim?

Komunikimi është shumë i rëndësishëm këtu. Edhe ekspertët habiten me atë që mund të paralelizohet dhe kështu të përshpejtohet. Kushton para, por nuk paraqet rrezik. Por, ajo që duhet të jetë shumë e qartë, natyrisht, është se kontrollet e sigurisë nuk mund të zhvillohen më shpejt ose më pak rrënjësore se zakonisht.

Një valë tjetër është përpara nesh, vala e gripit. A mendoni se është veçanërisht e rëndësishme ta bëjmë vaksinën e gripit këtë vit? Dhe nëse po, pse?

Nga njëra anë, për mbrojtje personale, sepse ende nuk e dimë nëse gripi e dobëson sistemin e imunitetit në atë mënyrw sa të bëhet më i ndjeshëm ndaj COVID-it.

Dhe nga ana tjetër, në mënyrë që të mos rëndohet sistemi shëndetësor. Gripi shoqërohet gjithashtu me një vdekshmëri të caktuar. Simptomat mund të jenë të ngjashme, kështu që urgjenca nuk mund të tregojë menjëherë a është COVID-19 apo grip.

Le të supozojmë se do ta kemi një vaksinë SARS-CoV-2: kush duhet të vaksinohet në fillim?

Idealja do të ishte që vaksina të jetë efektive tek të moshuarit. Ata kanë rrjedha më të rënda. Vaksina e gripit, për shembull, është më pak e efektshme tek njerëzit e moshuar sesa tek të rinjtë, gjë që mund të kompensohet me dozimin. Testet klinike do ta tregojnë këtë.

Dhe pastaj duhet të vaksionohen kryesisht njerëzit e moshuar dhe ata me sëmundje të mëparshme. Gjithashtu ata që janë veçanërisht të ekspozuar dhe që kanë një rrezik veçanërisht të lartë të përhapjes së virusit. Një i ri dhe i shëndetshëm, që jeton në një kasolle në pyll mund të jetë i fundit që vaksinohet.

Thomas Kamradt është drejtor i Institutit për Imunologji në Spitalin Universitar Jena dhe President i Shoqatës Gjermane për Imunologji. Intervistën e zhvilloi Julia Vergin. /DW