×
Hyrja
Profili

Nje histori e shkurter e internetit shqiptar...

Nje histori e shkurter e internetit shqiptar...

· 3 · 818

  • Postime: 26634
  • Gjinia: Mashkull
M A X
ne: 23-07-2010, 00:53:38
Ecuria e faqeve te internetit

Gjithmonë ka pasur një dëshirë për të përcaktuar si do jetë e ardhmja e internetit apo cila do ishte një faqe e suksesshme interneti të nesërmen. Megjithatë parashikimet e biznesit, të specialistëve dhe të shkencëtarëve kanë dështuar pothuaj gjithmonë.

Diku nga fundi i shekullit te kaluar :p, tendenca e parë ishte që faqet e internetit ishin një ambient tjetër për të transferuar tregjet e mallrave. Investime të shumta u panë në website tregëtare në vitet 1995-2000. Shuma të mëdha u investuan në infrastrukturë dhe teknologji. Shumë aplikime u zhvilluan në kohë rekord e shumë lëvizje bursash krijuan një perceptim sikur tregu do zhvendoset tërësisht online, por me sa duket ishte tepër shpejt dhe gjithçka dështoi duke lënë pas kohën e “dot-com bubble”.

Periudha në fjalë nuk pati shumë ndikim në tregjet europiane dhe as në atë Shqiptar ku interneti ishte pothuaj jo-ekzistent (Në vitin 2001, një nga 3 ISPtë shqiptare numëronte 1600 përdorues emaili me shërbim vetëm POP3 mbi dialup, dhe llogaritë e internetit të dedikuar ishin të numëruara me gishta). Kuptohet që numri i vogël i përdoruesve të internetit përcaktonte dhe interesin dhe numrin e pakët të faqeve shqiptare në internet.
Natyra njerëzore dhe ndikimi në faqet shqiptare

Në një situatë të tillë, faqet e para shqiptare u ndërtuan nga studentë amatorë jashtë Shqipërisë. Kuptohet dëshira për t’u lidhur me të tjerë individë krijoi faqet e para të cilat ishin kryesisht dhoma chati në të cilat anëtarët njiheshin të gjithë dhe numëroheshin me gishta. Nuk kam për qëllim të flas për historinë e faqeve shqiptare, por më shumë për të treguar ciklin se si faqet me përmbajtje dhe shërbime të ndryshme ngriheshin dhe binin pas një fare kohe, prandaj po vazhdoj më tej.

Ndërsa faqet me chat po lulëzonin, faqet e para që mbështesnin identitetin kulturor dhe kombëtar filluan të shfaqen. Informacionet e para ishin në anglisht por disa faqe filluan të shtyjnë për informacion në shqip për shqiptarët dhe jo vetëm për të huajt. Pikërisht në këtë kohë filluan të dalin dhe disa faqe të disa qyteteve kryesore shqiptare.

Pas ngopjes me Chat-ra, interesi filloi të drejtohej ndaj forumeve dhe ambienteve të diskutimeve të cilët ishin komunitet e para virtuale shqiptare. Shumë komunitete të tilla u ngritën dhe natyra disi më serioze e tyre u dha një hov dhe një audiencë të re. Është interesante të zbulosh pas afro 8-9 vjetësh, se një shtresë e mirë e politikanëve të sotëm ishin anëtarë të diskutimeve në këto forume të cilët me kalimin e kohës nisën të humbisnin ritmin dhe volumin e interesit të mëparshëm.

Të ngopurit me forume dhe chate, vizitorët filluan t’i braktisin këto ambiente për të lundruar në faqet nostalgjike me muzikë shqiptare duke kërkuar një argëtim personal larg përplasjeve të mendimeve dhe diskutimeve pa fund e pa rezultat. Faqet më të njohura, papritur u bënë faqet pirate të muzikës.

Këtu po ndaloj për të bërë një përmbledhje të natyrës njerëzore që ka ndikuar në zhvillimin e faqeve shqiptare deri më sot.

   1. Vetmia dhe ndjesia shoqërore e të pasurit njerëz të njohur vërdallë – Faqet e para shqiptare me dhoma chati
   2. Identiteti kombëtar dhe kulturor – Ndikoi në krijimin e faqeve të para mbi kombin, zonat apo qytetet shqiptare
   3. Dëshira për të ndikuar të tjerët, debatet e një niveli me intelektual – Forumet e para shqiptare
   4. Argëtim – Faqet e para me muzikë falas, lojra e të ngjashme.
   5. Identiteti i grupit – Faqe me media shoqërore si Facebook, HI5 e të ngjashme
   6. Egoizmi – Qendërzimi i figurës solli faqe-blog, profile si në Twitter e të ngjashme

Në listën e mësipërme mungon nevoja për informim dhe faqet e para mediatike shqiptare. Duke qenë se ato kanë qenë aktive gjatë gjithë kohës dhe mbulonin pak a shumë të njëjtën përqindje vizitorësh, po i lëmë jashtë listës së mësipërme. Nuk po ndalem në pikën 5 dhe 6 pasi e di që shumëkush e mendon ndryshe, por në rrënjë besoj se qëndrojnë përcaktimet më sipër. Përveç këtyre faqeve informative, janë dhe faqet me shërbime të nevojshme që marrin gjithmonë trafikun e tyre si rrjedhojë e përmbajtjes unike që ofrojnë.

Në këtë pikë duke parë historinë dhe ndienjat që motivuan çdo etapë të faqeve shqiptare;

   " A mund të parashikojë njeri kush do jenë faqet e së ardhmes!?"

Përfitimi dhe faqet shqiptare


Duhet përmendur që nuk janë vetëm faktorët shoqëror që ndikojnë në faqet shqiptare, duhet të përmend dhe ato politiko-ekonomik. Kontributi që jepet nga çdokush në ndërtimin e një faqeje, pritet të kthehet mbrapsht në formë reputacioni, reklame, ndikimi politiko-shoqëror ose shpërblimi financiar.

Epoka e Google Adsene solli interes në krijimin e faqeve të internetit. Papritur, aty ku dukej sikur nuk kishte asnjë fitim, por vetëm mund e kohë të shpenzuar, erdhi çasti që webmasterat po merrnin një shpërblim nga reklamat e vendosura në faqe.

Mundësia e një fitimi dhe volumi i programeve të lirë për përdorim (open-source) në internet solli dhe lulëzimin e faqeve me informacion pa fund e pa vlerë. Në një kohë të shkurtër numri i faqeve shqiptare u shumëfishua duke krijuar kopje identike dhe pak fantazi e individualitet.

Mundësia e fitimit nga një faqe interneti solli tepër interes dhe sot çdokush po pret të nuhasë se si do jetë faqja e suksesshme e së nesërmes që të nxitoj ta ndërtojë i pari :) Normalisht një studim i historisë së faqeve dhe peshimi i faktorëve të përfitimit duhet të japë një vizion se kush janë faqet e së ardhmes.

Megjithatë, e ardhmja është shpeshherë përtej imagjinatës sonë.  Ka disa gjëra që mund t’i parashikojmë e disa gjëra që nuk mundemi. Përshembull, gjithë ajo ndienjë ‘uni’ që reflektohet në blogje e twitter nuk mund të ishte parashikuar para shumëvitesh. Askush nuk do e kishte menduar që interneti do de-centralizohej në shumë individë. (Nëse do e kishim imagjinuar, mund ta kishim pranuar dhe ndoshta dhe vënë bast mbi faqet personale dhe jo mbi forumet psh)

U largova shumë për t’u kthyer tek mendimi i parë kur nisa të shkruaja këtë shkrim. Faqeve të internetit kanë ndjekur jo llogjikën, jo dëshirat ekonomike, por ato shpirtërore të krijuesve. Nuk di asnjë shembull ku themeluesi i një faqeje të madhe, (aktuale, ose nga ato shqiptare të vjetra) është nxitur nga llogaritë me laps, por di shumë që kanë nisur si një shkëndijë pasioni shoqëror dhe janë ngritur në faqet më ndikuese.

Ndërsa përfundimi tjetër që doja të nxirrja është se gjithmonë faqet e ndikuara shpirtërisht kanë një periudhë ngritje dhe rënie të shpejtë. Edhe faqet tek të cilat webmasterat drejtohen drejt përmbajtjes, drejt shifrave, drejt trafikut e madhështisë. Të arrish numra është e lehtë, por t’i arrish në mënyrë të qëndrueshme bazuar mbi vlera që sjell një faqe interneti është më e rëndësisshme. Nëse web-i drejtohet drejt numrave, ai humbet natyrën e tij dhe kthehet në lodër të dëshirave të çastit të vizitorëve.  Personalisht mendoj se e vetmja gjë që ka me vërte vazhdimësi është shërbimi dhe vlerat që faqet përcjellin tek vizitorët.

Burimi: http://armandbrahaj.blog.al/2010/07/21/mendime-mbi-faqet-e-internetit/

  • Postime: 26634
  • Gjinia: Mashkull
M A X
#1 ne: 29-05-2019, 02:38:17
Nje artikull i vjeter, por besoj se eshte me goxha vlere

Larmia e faqeve shqiptare në rrjet edhe pse jo e përkryer ka qen vazhdimisht duke u përmirësuar, e sot më shumë se kurrë shqiptarët janë në gjendje ta përdorin rrjetin jo vetëm për letërkëmbim dhe informacione të rëndësishme, por edhe për të ndërtuar në rrjet marrdhënie biznesi, shoqërore e deri në ato shpirtërore dhe fizike. Sot, kur kemi nisur të flasim për "blogsferën" shqiptare, nuk ka dyshim se prezenca jonë në web ka kaluar në një fazë më të zhvilluar se ajo e 10 vjetëve më parë, kur faqet shqiptare në rrjet ishin në një stazh foshnjor. Sot mund të lexosh një lajm interesant tek www.peshkupauje.com, ta verifikosh tek www.Shekulli.com.al, të ndjekësh në video të përditësuara Sonila Meçon ta prezantojë këtë bashkë me të rejat e ditës tek www.Vizionplus.tv e ndoshta të thellohesh më tej në temën duke diskutuar në ndonjë prej forumeve të shumtë ku flitet politikë më shumë sesa në kafenetë e kryeqytetit. Sot dikush mund të bëjë chat tek www.shqiperia.com, te degjojë muzike tek www.radioezeta.com, te kërkojë shoqen/shokun e jetës tek www.albanianpersona ls.com apo të kërkojë shërim nga një dervish tek www.sherime.com. Mundësitë janë të pafundme, dhe vetëm përmirësohen!!!

Vetëm se nuk ka qen gjithnjë kështu. Dikur egzistonin vetëm listat email dhe komunitetet brenda AOL, ngaqë atëhere bota e rrjetit shqiptar ishte e re, gjithashtu lundruesi i rrjetit në shqipëri ishte akoma jo efektiv. Në vitin 1996 nuk egzistonin më tepër se një grusht faqesh në shqip, dhe më tepër me ca shërbime krejtësisht tekst bëhej një përcjellje minimale e artikujve kryesorë të ATSH, të gjitha në servera të ngadaltë edhe për kohën kur flasim 28.kbs. Midis viteve 1995-1998 në internet nuk mësoje dot më shumë lajme nga Shqipëria se sa nga një radio me valë të shkurtra. Ndër të parat faqe ishte www.albanian.com, (tashmë e lënë plotësisht pas dore) një faqe me një përmbledhje të thjeshtë të historisë, kulturës dhe qyteteve shqiptare. Ajo që ishte interesante në këtë rast ishte se faqja në thojza zyrtare nuk i njihte kufijtë e RSh, por rrekej të përfaqsonte të gjithë shqiptarët në Ballkan.

Kishim gjithsej vetëm disa dyzina me fotografi nga shqipëria dhe këto i gjeje thuajse në të gjitha faqet, duke evidentuar kështu varfërinë teknologjike në vend. Edhe ato pak foto të reja nga Shqipëria u përkisnin më së shumti turistëve të huaj apo misjonarëve të ungjillizimeve. Ishin fare të paktë njerëzit brenda shqipërisë që ishin në gjendje të shkrepnin, zhvillonin, skanonin pastaj ngarkonin një fotografi në rrjet.
Shumica e përdoruesve shqiptarë ishin burokratë në zyra të ndryshme, kryesisht të Tiranës, ndërsa shërbimi i internetit nuk ofrohej për konsumatorin nga Alb Telekom apo ndonjë ISP (internet sevice provider), lulëzonin, siç vijojnë të lulëzojnë internet kafetë.

Asnjë faqe zyrtare e shtetit shqiptar nuk egzistonte deri rreth vitit 2000. Faqet Kosovare, pjesërisht edhe për shkak të nevojës që sillte agresioni serb, ishin në këtë kohë më të shumta e më të zhvilluara nga ana teknologjike. Edhe ato pak faqe që mirmbaheshin nga brenda Shqipërisë në këtë kohë vuanin nga mungesa e përditësimit. Ndërkohë uria për kontakt dhe informacion e emigrantëve shiptarë - që duhet theksuar se ishin eksploruesit e parë të rrjetit ndër ne - bëri që të merrnin një zhvillim mbresëlënës forumet. Forumet që nisën dikur nga fundi i 1998 deri në vitin 2001 kishin stabilizuar një ndjekje besnike. Faqe si www.albforumi.com e më vonë forume si www.zeriyt.com numërojnë mijra antarë. Sidoqoftë këto ishin dhejanë faqe amatore, me ekipe të vogla vullnetarësh dashamirës që janë pionerët e asaj që ka nisur të njihet si blogsfera shqiptare.

Në botën e rrjetit egzistojnë tashmë prej vitesh një mori faqesh shqiptare, shumë prej të cilave funksionojnë nëpërmjet krijimit të forumeve virtuale ku më pas miqtë që njihen në linjë kalojnë orë të gjata të ditës duke diskutuar apo bërë thashetheme, duke mundësuar kështu lindjen e një shoqërie vibrante dhe energjike, reale në atë që përcjell emocione shpesh fort të sinqerta e bën kështu të mundur krijimin e miqësive të vërteta.

Faqet për mirmbajtjen e të cilave paguhej që në fillim nisën të çajnë akullin virtual të Tiranës ishin nisma të gazetave të përditshme shqiptare. Koha Jone, Shekulli dhe Balkanweb nga Gazeta Shqiptare u lançuan të treja në internet në harkun e disa muajve, më saktë, midis mëntorit 1999 dhe Prillit 2000, duke superfishuar menjëherë sasinë e informacionit që mund të gjendej tashmë në internet. Sidoqoftë këtop ishin faqe me dizenjo të dobta dhe funksione të kushtëzuara, por që përmbushnin asokohe një nevojë parësore siç është nevoja për informacion. Këto faqe gazetash, kanë patur dhe vazhdojnë të kenë frekuentimin më të lartë ndër faqet shqiptare në rrjet. Duket, populli ynë mbetet i etur për politikën e ditës, dhe interesi i diasporës për sa ndodh në vend mbetet i lartë.

Disa prej faqeve të njohura shqiptare e kanë kaluar periudhën e tyre të shkëlqimit e tashnë ulje të frekuentimit. Faqet shqiptare janë të gjitha të reja, dhe në botën e internetit gjërat ndonjëherë ndryshojnë tepër shpejt për Webmasterat pa eksperiencë. www.albasoul.com dikur kishte nje frekuentim te bollshem, sikundër dhe fajtori.com por formatet e tyre të panryshuara prej vitesh dhe në rastin e parë politizimi i veprimeve të drejtuesve kanë bërë që llustra e këtyre faqeve të tregojë shenja pleqërie. Suksesi i menjëhershëm i ezeta.org, revistës alternative që ishte ëmbëlsirë për sytë në krahasim me të dyshuarit e zakonshëm e mbështet këtë ide, publiku ishte i lodhur nga kakofonia e forumeve dhe mezi priste një risi në përmbajtje dhe prezantim.

Të frymëzuar nga historitë e suksesit të myspace.com dhe facebook.com, edhe webmasterat shqiptarë kanë nxituar të krijojnë shërbime të ngjashme. Tani ideja ka ndryshuar. Në vend që të ofrosh një faqe, ofro një komunitet. www.faqet.com e grupit Gorani dhe http://miqte.shqiperia.com janë dy shërbime të që i lejojnë përdoruesit të ndërtojnë faqe të vogla personale në formë blogu duke ndërtuar kështu "një qytet virtual". Këto lloj komunitetesh kanë funksionuar në mënyrë të shkëlqyer dhe mundësia për të ndërtuar një faqe tënden pa qen mjeshtër i kodit html apo "computer geek", është tërheqëse për shumëkënd.

Me gjithë zhvillimet frymëzuese deri më tani, bota shqiptare e rrjetit mbetet ende e re dhe dinamike, e ashtu sikundër teknologjia, do të ndyshojë dhe rinovohet pafundësisht. Kërkesa e lartë ka bërë që shumë nga mendiat dhe gazetat shqiptare të përqëndrohen tek faqet e tyre në web, duke shtuar përmbajtjen dhe rritur shpejtësinë e përmirësuar dizenjot. E megjithatë kjo nuk është mjaft.
Që pas datës 2 Janar, gazeta The Wall Street Journal do të përmbajë shumë më pak fletë se nga çka tani, kjo sepse biznesi i gazetave prej letre ka nevojë ta rimishërojë veten në rrjet "në moshën e internetit". WSJ-ja do t'i lërë shumicën e lajmeve për faqen e saj në rrjet, duke printuar në letër vetëm artikujt që analizojnë lajmin.
Herët apo vonë prirjet e huaja ndiqen edhe nga bizneset shqiptarë, shpesoj që drejtuesit e këtyre mediave në shqipëri të jenë ndërkohë duke mbajtur shënime.

Kam vënë re se nuk egziston një faqe lajmesh nga shqipëria në anglisht. Shumë shqiptarë flasin gjuhët e botës në mënyrë të kulluar, por kur vjen puna te ngritja e një faqeje shqiptare në anglisht - një vrimë në ujë. Pse mendoj se është e rëndësishme? Sepse në rast se do provosh të kërkosh lajmet në Google (News) për "Albania" apo "Albanian" lajmet që do gjeni vijnë nga faqe serbe apo greke në anglisht. www.b92.net apo www.ekathimerini.co m dhe një mori faqesh të tjera ballkanike në anglisht (serbianna.com psh specializohet në lajme të zeza për shqiptarët) bëjnë të mundur që pikëvështrimi i tyre - jo yni - tu serviret lexuesve të shumtë anglishtfolës. Kjo duhet ndryshuar. Një faqe shqiptare që flet anglisht është e domosdoshme për të amplifikuar zërin e shqiptarëve në ballkan.

E ndër gjithë këto faqe që vizitojmë çdo ditë, është dhe ky cepi ynë i vogël i botës kibernetike, ky peshku ynë pa ujë që mundohet të krijojë një mundësi më tepër komunikimi mes qytetarëve shqiptarë. Media në duart e qytetarëve...shumë vetë qeshën me të madhe, por qesh mirë ai që qesh i fundit. Fakti që peshku ka njohur vetëm rritje tregon se në këtë epokë të komunikimit masiv, qytetarët që nuk janë pre e apatisë ndodhen të shpërndarë kudo, ata duan vetëm një pikëtakimi. Dhe nëse nisesh për të ndërtuar një faqe jo për interes personal por shoqëror, të inkurajoj ta bësh...nëse më lejohet një batutë nga filmat, do thoja si tek "Field of Dreams", "If you build it, they will come."

Blendi Salaj
 
Blendi, Mar 22, 2007

  • Postime: 609
  • Gjinia: Mashkull
Ωμέγα
#2 ne: 30-05-2019, 10:14:15
Sa keq qe albanian.com akoma pa vlere se ata qe e kane ne dore ose nuk munden ose nuk duan te bejne dicka me te.
 

Dy të mitur shqiptar në kampin e Al-Hol në Siri, daja kërkon riatdhesimin e tyre

Nisur nga InfoZRubrika Aktualiteti

Postimi i fundit 09-09-2020, 23:47:13
nga InfoZ
Datat më të rëndësishme në histori

Nisur nga InfoZRubrika Historia

Postimi i fundit 28-05-2020, 23:44:40
nga InfoZ
Poezi per Skenderbeun forumi shqiptar

Nisur nga InfoZRubrika Mix

Postimi i fundit 21-05-2020, 01:41:44
nga InfoZ
Dhoma chat shqiptar

Nisur nga InfoZRubrika Mix

Postimi i fundit 21-05-2020, 01:13:25
nga InfoZ
psikolog shqiptar

Nisur nga InfoZRubrika Parapre

Postimi i fundit 21-05-2020, 00:57:35
nga InfoZ